प्रधानमन्त्रीले भने-बलात्कारीलाई फाँसी दिन सकिन्न

प्रकाशित मिति: Mar 11, 2015  

२७ फागुन, काठमाडौं । बलात्कारीलाई फाँसीको सजाय दिने कानुन बनाउन माग बढिरहेकोबेला प्रधानमन्त्री सुशील कोइरालाले तत्काल त्यो सम्भव नहुने बताएका छन् । उनले फाँसीको सजाय नदिने अन्तराष्ट्रिय कानुनमा नेपालले हस्ताक्षर गरेकोले तत्काल असम्भव हुने बताए ।

Sushil-Koirala-and-Students

बुधबार विहान एमाओवादीको विद्यार्थी संगठन अखिल क्रान्तिकारीको ज्ञापन पत्र बुझ्दै प्रधानमन्त्री कोइरालाले बलात्कारीलाई हालकै कानुनमा व्यवस्था भएअनुसार हदैसम्मको कारवाही गर्ने प्रतिबद्धता जनाए ।

‘हामीले नयाँ कानुन बनाऊ र बलात्कारीलाई फाँसी देऊ भन्यौं,’ ज्ञापनपत्र बुझाउन बालुवाटार पुगेका अखिल क्रान्तिकारीका अध्यक्ष रमेश मल्लले अनलाइनखबरसँग भने, ‘प्रधानमन्त्री जीले अहिले सम्भव छैन, यसको लागि सदनको सहारा लिनुपर्छ र दलहरुसँग पनि छलफल गर्नुपर्छ भन्नुभयो ।’

बाराकी नाबालिका पुजा साह लगायतलाई बलात्कार गरी हत्या गर्नेहरुलाई फाँसीको सजायको व्यवस्था गर्न चौतर्फी आवाज उठिरहेको छ ।

क्रान्तिकारीका अध्यक्ष मल्लले सदनमा नयाँ कानुनको प्रस्ताव लैजान आफूहरुले आग्रह गरेको र दलीय सहमति जुटाउन आफूहरुले पनि पहल गर्ने बचन दिएको अनलाइनखबरलाई बताए ।

किरिया खर्चसहित क्षतिपूर्ति माग

अखिल क्रान्तिकारीले धादिङको पीडा गाविसमा विषाक्त रोटी खाँदा मृत्यु भएकाको परिवारलाई किरिया खर्च सहित उचित क्षतिपूर्ति दिन माग गरेको छ । उत्पीडित वर्ग, क्षेत्र जाति र समुदायलाई लक्षित गरी खाद्य सुरक्षाको नीति लागु गर्न पनि क्रान्तिकारीले बुझाएको ज्ञापनपत्रमा उल्लेख छ ।

एसिड आक्रमणकारीलाई कारवाही

क्रान्तिकारीले बसन्तपुरमा एसिड आक्रमणबाट घाइते भएका किशोरीहरुलाई उनीहरु उपचाररत अस्पतालबाटै एसएलसी परीक्षा दिने व्यवस्था मिलाउन पनि माग गरेको छ । एसिड छ्याप्नेलाई पहिचान गरी कारवाही गर्न पनि माग गरिएको छ ।

यही फागुन १० गते बसन्तपुरमा अज्ञात व्यक्तिले दुई किशोरीलाई एसिड आक्रमण गरेको थियो । आक्रमणकारीको पहिचान गर्न भने प्रहरी प्रशासनले अझै सकेको छैन ।

तपाईको प्रतिक्रिया

तपाईंको प्रतिकृया जनाउनुहोस्

सर्वाधिकार © 2017 नेपाल युएसए मिडिया इन्क. मा । Website Design By: www.ekumar.com.np