नारायणगढ–मुग्लिन सडक अब दैनिक ६ घण्टा बन्द हुने, यस्ता छन् वैकल्पिक मार्गहरु

प्रकाशित मिति: Mar 21, 2017  

काठमाडौं, चैत ८ । चितवनस्थित नारायणगढ–मुग्लिन सडक खण्ड अबदेखि हरेक दिन ६ घण्टा बन्द हुने भएको छ । आयोजनाले एक सूचना प्रकाशन गर्दै यही चैत १५ गते देखि अर्को सूचना नआउन्जेल सम्मको लागि उक्त सडक खण्ड दैनिक ६ घण्टा अर्थात बिहान १०ः०० बजेदेखि दिउँसो ४ः०० सम्म बन्द हुने जनाएको छ । सो सडक यसअघि हरेक दिन बिहान १०ः३० बजेदेखि दिउँसो ३ बजेसम्म साढे ४ घण्टा बन्द हुँदै आएको थियो ।

दैनिक साढे चार घण्टा सडक बन्द गरेर काम गर्दै आएपनि सडकमा सवारी साधनको चाप नघटेकाले डेढ घण्टा बढी सडक बन्द गरेर निमार्ण कार्यलाई तीव्रता दिन लागिएको आयोजनाले जनाएको छ ।राजमार्गको पुनर्निर्माणको काममा अग्ला पहाड फुटाउनु पर्ने र सडकको सतह मिलाउनु पर्ने भएका कारण दिउँसोको समयमा बन्द गरेर काम गरिरहेको आयोजनाले बताएको छ ।

सडक बन्द हुँदा काठमाडौं र पोखराबाट आउने सवारीलाई मुग्लिङमा र चितवनबाट जाने सवारीलाई दासढुंगामै रोक्ने गरिएको छ । दिउँसोको समयमा सडकखण्डमा पर्ने १६ किलो, घुमाउने, चार किलो र कालिखोलाका ठूला पहाड फुटाउने काम भइरहेको छ ।

२०७२ वैशाखमा निर्माण सुरु भएपछि यस अवधिमा ५० प्रतिशत काम हुनुपर्नेमा ३३ प्रतिशत मात्र प्रगति देखिएको छ । नारायणगढ–मुग्लिन सडकखण्डलाई सन् २०१७ अप्रिलसम्ममा चार लेनको बनाइसक्ने योजना कार्यतालिका रहेको छ ।

वैकल्पिक मार्ग प्रयोग गर्न अनुरोध
आयोजनाले बिहान १०ः०० बजेदेखि अपराह्न ४ः०० सम्म सो सडक हुँदै आवतजावत गर्ने सवारी साधनहरुलाई वैकल्पिक सडकको प्रयोग गर्न अनुरोध गरेको छ ।

आयोजनाले सार्वजनिक गरेको सवारी रुटअनुसार राजधानी काठमाडौँबाट पूर्वतर्फ जाने तीनवटा वैकल्पिक मार्ग प्रयोग गर्दा छोटो दूरीमा गन्तव्य पुग्न सकिने देखिन्छ । पश्चिमतर्फ भने एउटा मात्रै वैकल्पिक मार्ग भएकाले केही लामो दूरी यात्रा गर्नुपर्ने हुन्छ ।

पूर्व तर्फ जानको लागि बिपी राजमार्ग, त्रिभुवन राजपथ र हेटौँडा–भीमफेदी–बल्खु मार्ग प्रयोग गर्न सकिन्छ भने पश्चिमका लागि पृथ्वीराजमार्ग हुँदै सिद्धार्थ राजमार्ग प्रयोग गरेर गन्तव्यसम्म जान सकिन्छ । ती मार्गबाट १२ मिटरभन्दा लामा र बढी भार भएका ट्रकको हकमा भने नारायणगढ–मुग्लिन सडकको विकल्प नभएको आयोजनाले जनाएको छ ।

वैकल्पिक रुपमा बिपी राजमार्ग प्रयोग गरेर बनेपा हुँदै बर्दिबाससम्म पुग्दा एकसय ७७ किलोमिटर, त्रिभुवन राजपथ प्रयोग गरेर नौबिसेबाट हेटौँडा पुग्दा एकसय आठ किलोमिटर, बल्खुबाट भीमफेदी हुँदै हेटौँडासम्म जाँदा एकसय ४६ किलोमिटर दूरी छोटो हुने आयोजनाले जनाएको छ ।

पश्चिम तर्फ भने मुग्लिनबाट पोखरा हुँदै बुटवल जाँदा ७१ किलोमिटर दूरी लामो हुने देखिएको छ । सवारी आवागमन बन्द भएपछि हुने सवारी जामलाई व्यवस्थित गर्न सडकखण्डमा चौबिसै घन्टा मोटरसाइकलमा प्रहरी परिचालन गरिँदैछ भने बिग्रेका सवारी हटाउनका लागि क्रेन र डोजर तयारी अवस्थामा राखिएको छ ।

तपाईको प्रतिक्रिया

तपाईंको प्रतिकृया जनाउनुहोस्

सर्वाधिकार © 2017 नेपाल युएसए मिडिया इन्क. मा । Website Design By: www.ekumar.com.np