गृहमन्त्री बिना नै निर्वाचन, रमेश लेखक कि गोपालमान श्रेष्ठ ?

प्रकाशित मिति: May 3, 2017  

काठमाडौं,बैशाख २० । प्रहरी प्रमुख नियुक्तिमा वरीयताबाट सुरु खटपट प्रधानन्यायाधीश प्रकरणसम्म पुगेपछि गृहमन्त्री विमलेन्द्र निधिले राजीनामा दिएयता गृह मन्त्रालय नेतृत्वविहीन छ । देशको शान्ति सुरक्षाको जिम्मा लिएको यो मन्त्रालय भागबन्डाको पूर्वसहमतिअनुरूप कांग्रेसको भागमा परेको उल्लेख गर्दै सत्ता नेतृत्वकर्ता माओवादी केन्द्र उसैको निर्णय पर्खेर बसेको छ । कान्तिपुर दैनिकले समाचार छापेको छ ।

स्थानीय चुनाव र पछिल्लो राजनीतिक उताचढावबीच गृह अहिलेलाई खाली रहने हो कि भन्ने आशंका सरकारी अधिकारी नै गर्छन् । आइतबार राजीनामा दिएका निधि बुधबार सरकारी क्वार्टर छाडेर नयाँबानेश्वरस्थित निवास सर्दै छन् ।

स्रोतका अनुसार भौतिक योजना तथा निर्माणमन्त्री रमेश लेखक र कांग्रेस सांसद गोपालमान श्रेष्ठ गृहमन्त्रीको चर्चामा छन् । आलोपालो सहमतिअनुरूप पुष्पकमल दाहाल नेतृत्वको सरकारको आयु सकिनै लाग्दा छोटो अवधिका लागि भए पनि लेखक गृह मन्त्रालयको ‘पोर्टफोलियो’ सित जोडिन चाहन्छन् ।

लेखक र श्रेष्ठ दुवै कांग्रेस सभापति शेरबहादुर देउवाका विश्वासपात्र मानिँदै आए पनि लेखकको राजनीतिक सक्रियता, निर्णय क्षमता र क्षेत्रीय निकटताका कारण उनी प्राथमिकतामा पर्न सक्छन् ।

सरकारका प्रवक्ता तथा सञ्चारमन्त्री सुरेन्द्र कार्कीले पूर्वसहमतिबमोजिम कांग्रेसको निर्णयअनुसार गृहमन्त्री आउने बताए । ‘राप्रपाभित्र आन्तरिक विवाद चर्केर उहाँहरू सरकारबाहिर जाने निर्णयमा पुग्नुभयो, तर त्यहीँभित्रको अर्को पक्षको दबाबमा उहाँहरू फेरि सरकारमै फर्कने सम्भावना पनि छ’, कार्कीले भने, ‘त्यस्तो अवस्था आयो भने कांग्रेससँग परामर्शमा गृहको जिम्मेवारीबारे नयाँ ढंगले छलफल पनि होला, नत्र सामान्य सहमतिअनुसार त त्यो कांग्रेसकै आन्तरिक निर्णयाधिकारभित्रको कुरो हो ।’

मन्त्री लेखकले प्रधानमन्त्री र आफ्ना पार्टी सभापतिबीच आन्तरिक समन्वयमा छिट्टै गृहमन्त्री तोकिने बताए । ‘गृह मन्त्रालयजस्तो संवेदनशील अंग यस्तो बेला खाली राख्नु हुँदैन भन्नेमा सरकार र पार्टी दुवै संवेदनशील छन्’, लेखकले भने, ‘प्रधानमन्त्रीसँग पार्टी सभापतिज्यूले यसबारे छिट्टै कुराकानी गरेर टुंगो लगाउनुहुनेछ ।’

स्रोतका अनुसार सरकारलाई दिएको समर्थन फिर्ता लिने निर्णय कार्यसम्पादन समिति बैठकमार्फत गराइसकेको लोकतान्त्रिक फोरम सरकारमा आउने अवस्थामा त्यसका नेता विजयकुमार गच्छदारले आफूले गृह पाउनुपर्ने सर्त तेर्स्याएका छन् ।

देउवा भने गच्छदारलाई भौतिक योजनामा लगेर लेखकलाई गृह दिने मनस्थितिमा पुगेको स्रोतको दाबी छ । गच्छदारले मंगलबार पार्टीको बैठकमा आफू अहिले गृहमन्त्री बन्न जाने चर्चा ‘अनुमान मात्रै’ भएको भन्दै अस्वीकार गरे । ‘हामी अहिले सरकारमा जाँदैनौं, तर राजनीतिक विषमता बढेको बेला समर्थन फिर्ताको गल्ती गर्नु हुँदैन’, गच्छदारलाई उद्धृत गर्दै पार्टी स्रोतले भन्यो ।

लोकतान्त्रिक फोरम संसदीय दलका प्रमुख सचेतक योगेन्द्र चौधरीले भने, ‘हाम्रा मागहरू अझै पूरा नभएकाले सरकारमा नजाने निर्णय गर्‍यौं, तर मधेसी, थारूलगायतका माग सम्बोधन गर्न संविधान संशोधन विधेयक ल्याउने सरकारको कदम सकारात्मक भएकाले अहिले समर्थन जारी रहन्छ ।’

उनले उपप्रधानमन्त्री र गृहमन्त्री पाए गच्छदार जान सक्ने चर्चा पूरै गलत रहेको बताए ।

गृहमन्त्री निधिले राजीनामा दिएकै साँझ नेपाली सेनाको जंगी अड्डाले देशमा आन्तरिक सुरक्षा संवेदनशीलता बढेको विश्लेषण गर्दै वक्तव्य निकाल्नुले गृहको रिक्तता तत्कालै अनुभूति भएको दर्साउँछ ।

वैशाख ३१ को स्थानीय चुनावअगाडि शान्ति सुरक्षाको प्रभावकारी नेतृत्व र व्यवस्थापनका लागि गृह सरकारको महत्त्वपूर्ण अंग हो ।

निधिले कसलाई आईजीपी बनाउने भन्ने निर्णय गृहमन्त्रीको क्षेत्राधिकारभित्र पर्ने भए पनि पार्टी सभापतिले हस्तक्षेप गरेको असन्तुष्टि दर्साउँदै आएका थिए ।

प्रधानन्यायाधीश सुशीला कार्कीमाथि प्रधानमन्त्री पुष्पकमल दाहाल र कांग्रेस सभापति देउवाले अकस्मात् महाअभियोग प्रस्ताव ल्याएको भन्दै उनले सरकारमा बस्न उपयुक्त नभएको कारण देखाउँदै राजीनामा दिएका थिए ।

तपाईको प्रतिक्रिया

तपाईंको प्रतिकृया जनाउनुहोस्

सर्वाधिकार © 2017 नेपाल युएसए मिडिया इन्क. मा । Website Design By: www.ekumar.com.np